Япония парламентининг юқори палатаси 19 сентябрь, шанба куни миллий қуролли кучларга мамлакат ташқарисидаги ҳарбий ҳаракатларда иштирок этишга рухсат берувчи қонун лойиҳасини маъқуллади. Reuters’нинг ёзишича, қонун июль ойида қуйи палата томонидан қабул қилинган эди, шу сабабли ушбу қонун тўлақонли қабул қилинди, дейиш мумкин.
Япония бош вазири Синдзо Абенинг аниқлик киритишича, парламент томонидан қабул қилинган бу қонун «одамларнинг тинч ҳаёт тарзини ҳимоя қилиш, шунингдек, қуролли низо олдини олиш учун зарурдир». У «мазкур ҳужжатнинг маъно-мазмунини жамиятга тушунтириб бериш учун тинмай ҳаракат қилиши»ни айтиб ўтди.
Ҳужжатга мувофиқ, Мудофаа кучлари (Япония армияси), Япониянинг ўзи ҳужумга учрамаётган бўлса-да, дўст мамлакатларни жамоа бўлиб мудофаа қилишда қатнашиши мумкин, айни вақтда, Япония армиясининг бу ҳаракатларга қўшилиши учун бир қатор шартлар бажарилиши керак.
Хусусан, қонунга кўра, Япония армияси кучларидан фойдаланиш учун мазкур низони ҳал қилишнинг қуролли куч ишлатишдан бошқа муқобил йўли қолмаган бўлиши керак. Куч чекланган миқдорда ишлатилади, ўз навбатида, мазкур низо Япониянинг мавжуд бўлиши ҳамда унинг халқи ҳаёти ва озодлигига таҳдид солиши керак.
Қонуннинг қабул қилинаётган вақтда парламент биноси олдида оммавий норозилик намойишлари давом этаётган эди. Намойишчиларнинг фикрича, бу қонун мамлакатнинг тинчликпарвар (пацифистик) конституциясига зид ва 70 йиллик тинч ҳаётдан сўнг янги ҳарбий ҳаракатларни қўзғаши мумкин.
Япония Иккинчи жаҳон урушида мағлубиятга учраганидан сўнг, АҚШнинг босими остида пацифистик конституция қабул қилишга мажбур бўлганди, унга мувофиқ Япония урушдан халқаро баҳсларни тартибга солиш воситаси сифатида воз кечганди.
Бироқ сўнгги вақтларда, айниқса, Хитой томонидан ўсиб бораётган таҳдид сабаб, Япония конституциянинг тинчликпарварлик йўналишини қайта кўриб чиқишни бошлади.
Изоҳ (0)