Sotheby’s auksion uyi kamyob moviy brilliant — Blue Moon (“Moviy oy”)ni savdoga qo‘ydi. CNN’ning qayd etishicha, brilliant 35—55 million dollarga baholangan. Kimoshdi savdosi 11-noyabr kuni Jenevada bo‘lib o‘tadi.
Qimmatbaho toshning og‘irligi 12,03 karatga teng bo‘lib, o‘z tasnifida eng yiriklaridan biri hisoblanadi. Kimoshdi savdolari uyining qimmatbaho buyumlar bo‘yicha xalqaro bo‘linmasi raisi Devid Bennettning so‘zlariga ko‘ra, brilliant juda ham toza. Savdogacha mazkur tosh Gongkong, London va Nyu-Yorkda namoyish etiladi.
“Moviy oy” 2014-yili Janubiy Afrikadagi Kullinan konidan topilgan, og‘irligi 29,60 karat bo‘lgan olmosdan tayyorlangan bo‘lib, keyinchalik bu tosh Cora International kompaniyasiga 25,6 million dollar evaziga sotilgan edi.
Hozirgi kunda og‘irligi 24,78 karatga teng The Graff Pink (“Pushti Graff”) kimoshdi savdo uyi savdolari vaqtida sotilgan eng qimmat brilliant hisoblanadi. 2010-yili u 46,16 million dollarga pullangan. 9,75 karatli Zoe Diamond (“Zoi brillianti”) esa eng qimmat sotilgan moviy brilliantdir — u 2014-yil noyabrida 32,65 million dollarga sotilgan.
Izoh (0)