Цюрих ва Женева (Швейцария) Нью-Йорк ҳамда Лондонни ортда қолдириб, яшаш учун дунёдаги энг қиммат шаҳарлар, деб тан олинди. Бу ҳақда UBS AG банки тадқиқотларига таяниб, «Интерфакс» хабар бермоқда.
Уч кишидан иборат оила 122 та позициядан иборат (уй ижараси тўлови бунга киритилмаган) маҳсулот ва хизматларнинг минимал тўпламини қўлга киритиш учун Цюрихда ойига 3600, Женевада эса 3500 доллар ишлаб топиши керак. Нью-Йоркда бу кўрсаткич 3340, Лондонда эса 2800 долларга тенг.
Шуниси ҳам борки, Швейцариядаги мазкур шаҳарлар аҳолиси бошқа мамлакатдагиларга қараганда яхшироқ топади. Масалан, Цюрихдаги ўртача иш ҳақи соатига 41 долларни ташкил этади. Маошлар индексида (унда Нью-Йорк аҳолисининг иш ҳақи 100 пункт сифатида асос қилиб олинган) Цюрих 141,7, Женева 135,1 пунк тўплади. Ушбу рўйхатдаги охирги ўринни 6,3 пункт кўрсаткич билан Киев ва Найроби эгаллаган.
«Биг Маг» сендвичини сотиб олиш учун қанча вақт ишлаш лозимлигини кўрсатувчи «Биг Маг индекси»ни Гонконг ва Люксембург тегишлича, 9 ва 10 дақиқа билан бошлаб берди. Токио, Сидней, Вена, Мюнхен, Монреаль ва Никосия каби 19 та шаҳар аҳолисига бунинг учун 15 дақиқадан камроқ муддат керак бўлади. Қоҳира, Жакарта, Мехико ва Манилада бунга бир соатдан зиёд, Найробида эса деярли уч соат керак бўлади.
Яна бир шундай кўрсаткич — «iPhone индекси»га кўра, 16 Гб хотирага эга iPhone 6 харид қилиш учун Цюрих фуқаросига 21 соат, Нью-Йорк, Майами, Лос-Анжелес ва Чикаго аҳли учун 30 соатдан камроқ, лондонликка эса 41 соат керак бўлади. Москвада бу смартфонни бир ойда ишлаб олиш мумкин бўлса, Киевда бунинг учун 13 ҳафта тер тўкишга тўғри келади.
Изоҳ (0)