Avstraliyalik bokschi kichik Devid Braun filippinlik Karlo Magali bilan jang vaqtida olgan jarohatlari oqibatida vafot etdi. Bu haqda “Korrespondent.net” xabar bermoqda.
O‘rta yengil vazn toifasida Xalqaro boks federatsiyasi (IBF)ning mintaqaviy sovrinlaridan biri uchun tashkil etilgan jang 11-sentabr, juma kuni Avstraliyaning Inglbern shahrida bo‘lib o‘tdi va filippinlik bokschining 12-raunddagi nokautli g‘alabasi bilan yakuniga yetdi.
Jang yakuniga yetishi bilan 28 yoshli Braun bosh-miya jarohati bilan og‘ir ahvolda shoshilinch tarzda kasalxonaga yetkazildi. Shifokorlar sportchining hayotini saqlab qolish uchun uch kun kurash olib bordi, biroq Braun 14-sentabr kuni vafot etdi.
Professional ringda Braun 25 ta jang o‘tkazib, 22 jangda g‘alaba qozongan edi. Bundan tashqari, u ikki marta mag‘lubiyatga uchragan, bir safar uning ishtirokidagi jangda durang qayd etilgan edi.
Izoh (0)