Австралиялик боксчи кичик Дэвид Браун филиппинлик Карло Магали билан жанг вақтида олган жароҳатлари оқибатида вафот этди. Бу ҳақда «Корреспондент.net» хабар бермоқда.
Ўрта енгил вазн тоифасида Халқаро бокс федерацияси (IBF)нинг минтақавий совринларидан бири учун ташкил этилган жанг 11 сентябрь, жума куни Австралиянинг Инглберн шаҳрида бўлиб ўтди ва филиппинлик боксчининг 12-раунддаги нокаутли ғалабаси билан якунига етди.
Жанг якунига етиши билан 28 ёшли Браун бош-мия жароҳати билан оғир аҳволда шошилинч тарзда касалхонага етказилди. Шифокорлар спортчининг ҳаётини сақлаб қолиш учун уч кун кураш олиб борди, бироқ Браун 14 сентябрь куни вафот этди.
Профессионал рингда Браун 25 та жанг ўтказиб, 22 жангда ғалаба қозонган эди. Бундан ташқари, у икки марта мағлубиятга учраган, бир сафар унинг иштирокидаги жангда дуранг қайд этилган эди.
Изоҳ (0)