Braziliya futbol konfederatsiyasi mamlakat milliy terma jamoasi hujumchisi Neymarning to‘rt oylik diskvalifikatsiyasi ustidan Lozannadagi sport arbitraj sudiga shikoyat qiladi. Bu haqda “TASS” xabar bermoqda.
Mazkur diskvalifikatsiya doirasida braziliyalik hujumchi milliy terma jamoaning JCh-2018 saralashi doirasida oktabr oyida tashkil etiladigan ikki o‘yini — Venesuela va Chiliga qarshi bahslarni o‘ktazib yuborishi kerak.
Neymar Amerika Kubogi doirasidagi o‘yindan so‘ng to‘rtta o‘yinga chetlatilgan edi. 23 yoshli futbolchi Kolumbiyaga qarshi guruh bosqichi uchrashuvi yakunida raqib futbolchisi Karlos Bakka bilan janjallashgani sabab maydondan chetlatilgan.
Uchrashuv yakuniga yetganidan so‘ng esa Neymar himoyachi Pablo Armeroni to‘p bilan nishonga olgan, Bakka esa jamoadoshining yonini olib, Neymarni turtib yuborgan. Diskvalifikatsiyadan tashqari, Neymar 10 ming yevro miqdorida jarima ham to‘lashi kerak. Kolumbiyaliklar hujumchisi Bakka esa ikki o‘yinga chetlatilgan.
Avvalroq FIFAning tartib-intizom qo‘mitasi Neymarning diskvalifikatsiyasi bo‘yicha Braziliya futbol konfederatsiyasi bergan apellyatsiyani rad etgandi.
Izoh (0)