5-sentabr kuni Xalqaro ot sporti federatsiyasi (FEI), O‘zbekiston Madaniyat va sport ishlari vazirligi hamda O‘zbekiston ot sporti federatsiyasi hamkorligida “Chellenj” jahon kubogining mintaqaviy sirtqi bosqichi o‘tkaziladi. Bu haqda tashkilotchilar “Daryo”ga ma’lum qildi.
Konkur – to‘siqlardan ot sakratish yo‘nalishidagi musobaqalar 15 yoshdan katta sportchilar o‘rtasida ikki toifa bo‘yicha o‘tkaziladi: “A” toifa 120—130 sm balandlikdagi to‘siqlar, “B” toifa 110—120 sm balandlikdagi to‘siqlar.
“A” toifasida maksimal ball yig‘gan sportchilar 2016-yilda o‘tkaziladigan “Chellenj” jahon kubogining sirtqi final bosqichida ishtirok etishga nomzod bo‘ladi. Jahon kubogi g‘oliblari esa to‘g‘ridan-to‘g‘ri Olimpiada o‘yinlariga yo‘llanma oladi.
5-sentabr, 24-oktabr va 14-noyabr kunlari O‘zbekistonda “Chellenj”ning uchta bosqichi o‘tkaziladi. Barcha musobaqalar Bo‘stonliqdagi “Allyur” ot sporti klubida bo‘lib o‘tadi. O‘zbekistonlik sportchilarning raqiblari Markaziy Osiyo va Yaqin Sharqdan kelgan chavandozlar bo‘ladi.
Izoh (0)