Omsk shahri markazida 20 yoshli qizga qarata pnevmatik to‘pponchadan o‘q uzgan tay boksi bo‘yicha rossiyalik jahon chempioni Oksana Kinjerovaga nisbatan “Do‘pposlash” moddasi bo‘yicha jinoyat ishi ochildi. Bu haqda “TASS” xabar bermoqda.
Tekshiruvga ko‘ra, 18-avgust kuni Omsk shahridagi ko‘chalarning birida svefotorning qizil chirog‘iga to‘xtagan Toyota Alteza va Toyota Celica avtomobillari haydovchilar yo‘ldagi ustunlik masalasida tortishib qolgan. Oqibatda, Alteza’ning rulida bo‘lgan Kinjerova ikkinchi mashinaga qarata pnevmatik to‘pponchadan ikki marta o‘q uzib, hodisa joyidan ketgan.
O‘qlardan biri 20 yoshli yo‘lovchining boshiga tekkan. Uni kasalxonaga olib borishgan. Qiz jarrohlik amaliyotini boshdan o‘tkazgan, uning hayotiga hech qanday xavf yo‘q.
Hozirgi vaqtda sportchi qizga tegishli pnevmatik qurol olib qo‘yilgan va u ballistik ekspertizadan o‘tkazilishi belgilangan. Davolanishni yakunlaganidan so‘ng jabrlanuvchi qiz sud-tibbiy ekspertizasidan o‘tkaziladi va shu bilan yetkazilgan tan jarohatining darajasi aniqlanadi.
Oksana Kinjerova tay boksi bo‘yicha Rossiya terma jamoasi a’zosi hisoblanadi. 2014-yili u Malayziyadagi musobaqada Finlandiya, Ukraina, Shvetsiya va Buyuk Britaniya sportchilarini mag‘lub etib, jahon chempioni bo‘lgandi.
Izoh (0)