YeChL guruh bosqichi qur’asida Yevropaning eng yaxshi futbolchisi nomi e’lon qilinadi

Futbol bo‘yicha Yevropa Chempionlar ligasi guruh bosqichiga qur’a tashlash marosimida UEFA talqini bo‘yicha Yevropaning 2014/15-yilgi mavsumidagi eng yaxshi o‘yinchi nomi e’lon qilinadi. Bu haqda “Stadion.uz” xabar bermoqda.

Mazkur nomga uch futbolchi — argentinalik Lionel Messi (“Barselona”), portugaliyalik Krishtianu Ronaldu (“Real Madrid”) va urugvaylik Luis Suares (“Barselona”) da’vogarlik qilmoqda.

Eng yaxshi o‘yinchi nomini aniqlaydigan hay’at a’zolari UEFA tarkibidagi barcha 54 mamlakatdan taklif etilgan jurnalistlardan iborat.

Hay’atning har bir a’zosi besh nafardan o‘z nomzodini ilgari surgan, saralab olingan 35 futbolchidan 10 nafari ikkinchi bosqichga o‘tgan. Ular orasidan oxirgi uch nafari final bosqichiga yo‘l olgan.

Ma’lumot uchun, YeChL guruh bosqichiga qur’a tashlash marosimi 27-avgust, payshanba kuni Monakoda bo‘lib o‘tadi.