Омск шаҳри марказида 20 ёшли қизга қарата пневматик тўппончадан ўқ узган тай бокси бўйича россиялик жаҳон чемпиони Оксана Кинжеровага нисбатан «Дўппослаш» моддаси бўйича жиноят иши очилди. Бу ҳақда «TASS» хабар бермоқда.
Текширувга кўра, 18 август куни Омск шаҳридаги кўчаларнинг бирида свефоторнинг қизил чироғига тўхтаган Toyota Alteza ва Toyota Celica автомобиллари ҳайдовчилар йўлдаги устунлик масаласида тортишиб қолган. Оқибатда, Alteza’нинг рулида бўлган Кинжерова иккинчи машинага қарата пневматик тўппончадан икки марта ўқ узиб, ҳодиса жойидан кетган.
Ўқлардан бири 20 ёшли йўловчининг бошига теккан. Уни касалхонага олиб боришган. Қиз жарроҳлик амалиётини бошдан ўтказган, унинг ҳаётига ҳеч қандай хавф йўқ.
Ҳозирги вақтда спортчи қизга тегишли пневматик қурол олиб қўйилган ва у баллистик экспертизадан ўтказилиши белгиланган. Даволанишни якунлаганидан сўнг жабрланувчи қиз суд-тиббий экспертизасидан ўтказилади ва шу билан етказилган тан жароҳатининг даражаси аниқланади.
Оксана Кинжерова тай бокси бўйича Россия терма жамоаси аъзоси ҳисобланади. 2014 йили у Малайзиядаги мусобақада Финландия, Украина, Швеция ва Буюк Британия спортчиларини мағлуб этиб, жаҳон чемпиони бўлганди.
Изоҳ (0)