Qozog‘istonning Ostona shahrida dzyudo kurashi bo‘yicha o‘tkazilayotgan jahon chempionatida 26-avgust kuni erkaklar o‘rtasida -73 kg vaznda, xotin-qizlar o‘rtasida esa -57 kg vazn toifasida g‘olib va sovrindorlar nomi ma’lum bo‘ldi, deb xabar beradi “Olamsport.com”.
Erkaklar o‘rtasida bo‘lib o‘tgan musobaqaning hal qiluvchi final bellashuvida dzyudo vatani — Yaponiya vakillari Shoxey Ono hamda Riki Nakaya jahon chempionatining oltin medali uchun o‘zaro kurash olib bordi. O‘ta murosasiz ruhda kechgan bahsda Shoxey Ononing qo‘li baland keldi.
Afsuski, o‘zbekistonlik Sharofiddin Boltaboyev va Mirali Sharipov sovrindorlar safidan joy ola bilmadi. Sharipov dastlabki bahsdayoq xitoylik sportchiga imkoniyatni boy bergan bo‘lsa, Boltaboyev ketma-ket uch raqibini mag‘lubiyatga uchratib, to‘rtinchi bellashuvda Riki Nakayaga imkoniyatni boy berdi.
Xotin-qizlar o‘rtasida o‘tkazilgan bellashuvlarda ham oltin medalga Yaponiya terma jamoasi a’zosi Kaori Matsumoto sazovor bo‘ldi.
Uchinchi kungi musobaqalar yakunlariga ko‘ra, Yaponiya terma jamoasi 3 ta oltin, 2 ta kumush va 2 ta bronza medali bilan umumjamoa hisobida birinchi o‘rinda bormoqda. Ikkinchi o‘rinni bittadan oltin va kumush medalga sazovor bo‘lgan mezbonlar egallab turgan bo‘lsa, Janubiy Koreya terma jamoasi 1 ta oltin va 3 ta bronza medali bilan uchinchi o‘rinni band etib turibdi. O‘zbekiston terma jamoasi bitta bronza medali bilan 120 davlat orasida 9-o‘rinda boryapti.
Bugun, 27-avgust kuni erkaklar o‘rtasida -81 kg vaznda, xotin-qizlar o‘rtasida esa -63 kg vazn toifasida bellashuvlar o‘tkaziladi. Shu kuni O‘zbekiston terma jamoasi a’zolaridan Yahyo Imomov va Muhayyo Ibragimova tatamiga chiqadi.
Izoh (0)