O‘zbekiston Respublikasi davlat mustaqilligining 24 yilligi arafasida O‘zA muxbiri Amerika Qo‘shma Shtatlarining O‘zbekistondagi Favqulodda va muxtor elchisi Pamela Spratlen bilan suhbatlashdi.
Suhbat davomida Pamela Spratlen O‘zbekiston o‘tgan 24 yil ichida mustaqil davlat sifatida amalga oshirgan islohotlari samaralari bilan faxrlansa arzishini ta’kidlab o‘tdi.
“Toshkent va Samarqand o‘rtasidagi tezyurar temiryo‘l aloqasi deysizmi, axborot texnologiyalari sohasidagi yutuqlar deysizmi yoki yosh avlodga ingliz tilini o‘rgatishga qaratilayotgan e’tibor deysizmi, umuman, barcha sohalarda qo‘lga kiritilayotgan muvaffaqiyatlar O‘zbekistonning barqaror rivojlanayotganidan dalolat beradi. Mamlakatingizda turli millat va konfessiyalar o‘rtasidagi etnik va diniy bag‘rikenglikni mustahkamlash, shuningdek, xorijiy davlatlar, xususan, AQSh bilan do‘stona va o‘zaro manfaatli hamkorlik aloqalarini yanada rivojlantirish borasida keng ko‘lamli ishlar amalga oshirilmoqda”, — deydi u.
Shuningdek, Pamela Spratlen AQSh va boshqa xalqaro sheriklar hamkorligida O‘zbekistonda odil sudlov tizimidagi islohotlarni yanada kengaytirish maqsadida ommaviy axborot vositalari va sud tizimining o‘zaro hamkorligiga bag‘ishlangan qator tadbirlar o‘tkazilganligini aytib o‘tdi.
“O‘zbekistonga tashrif buyurishimdan ko‘p o‘tmay Xotin-qizlar qo‘mitasida bo‘ldim. Mamlakatingizda xotin-qizlar uchun yaratilgan keng imkoniyatlar bilan tanishdim. Biz xotin-qizlar uchun yaratilgan bunday imkoniyatlarni yanada yaxshilash, ularning puxta ta’lim egallashi va hayotdan to‘la zavq olishi yo‘lida o‘zaro hamkorlikni yanada rivojlantirish tarafdorimiz”, — deydi Pamela Spratlen.
Suhbat so‘ngida muxtor elchi mustaqillikning 24 yilligi bilan tabriklab, AQSh xalqi va elchixona xodimlari nomidan O‘zbekiston xalqiga abadiy tinchlik, farovonlik, omad va omonlik tiladi.
Izoh (0)