Bu yil qariyb 1,5 mln kishi haj safariga chiqadi

Bu yil Makka va uning atrofidagi muqaddas joylar ziyoratiga 1,5 million kishi qatnashadi, deya xabar bermoqda UzDaily Saudiya Arabistoni Haj vazirligiga tayanib.

Saudiya Arabistoni OAVlariga ko‘ra, 23-avgust, yakshanba kuni Makka ma’muriy okrugi amiri, qirol maslahatchisi Xolid al Faysal rahbarligida hajni tashkil qilish markaziy qo‘mitasi majlisi bo‘lib o‘tdi.

Uning ta’kidlashicha, bu yil Makkaga chet eldan 1,35 million, Saudiya Arabistonining boshqa provinsiyalaridan 185 ming ziyoratchi haj safari uyushtirishi kutilmoqda. Ayni paytgacha haj uchun qirollikka 100 mingga yaqin kishi tashrif buyurgan.

Bu yil Makkadagi muqaddas ziyoratgohlarga haj safari 20-sentabrdan boshlanadi.