AQShning Las-Vegas shahrida 7—12-sentabr kunlari o‘tkaziladigan jahon chempionatida ishtirok etuvchi erkin, yunon-rim va ayollar kurashi bo‘yicha O‘zbekiston terma jamoalari tarkibi ma’lum bo‘ldi. Bu haqda O‘zbekiston Milliy olimpiya qo‘mitasi matbuot xizmati xabar berdi.
O‘zbekiston terma jamoasi tarkibidan jami 14 nafar sportchi — 7 nafar yunon-rim kurashchisi, 5 nafar erkin kurashchi hamda 2 nafar xotin-qizlar kurashi vakillari o‘rin olgan. Mazkur jahon chempionati Rio-2016 Olimpiadasi yo‘llanmalari o‘ynaladigan dastlabki musobaqa hisoblanadi.
Jahon chempionatining yunon-rim kurashi bo‘yicha musobaqalarida O‘zbekiston nomidan murabbiylar Kamil Fatkullin va Rustam Qudratov qo‘l ostida shug‘ullanayotgan Elmurat Tasmuradov (-59 kg), Aleksandr Loxov (-66 kg), Nurbek Xolmuhammatov (-71 kg), Nurbek Hoshimbekov (-75 kg), Besiki Soldadze (-80 kg), Rustam Assakalov (-85 kg), Jahongir Turdiyev (-98 kg) qatnashadi.
Erkin kurash bahslarida (murabbiylar — Aleksandr Nedorezov, Ubaydulla Toirov) Mahmudjon Shavkatov (-57 kg), Ixtiyor Navro‘zov (-65 kg), Bekzod Abdurahmonov (-70 kg), Rashid Qurbonov (-74 kg), Umidjon Ismanov (-86 kg), ayollar kurashida esa (murabbiy — Ahmet Kagarmanov) Dauletbike Yaxshimuratova (-48 kg) va Zuhra Mustanova (-53 kg) O‘zbekiston sharafini himoya qiladi.
JCh—2015 hakamlari tarkibidan Konstantin Mixaylov va Tohir G‘ulomov kabi o‘zbekistonlik mutaxassislar o‘rin egallagan.
Jahon chempionatida o‘z vazn toifasida 1—6-o‘rinlarni egallagan sportchilar Olimpiada o‘yinlarida ishtirok etish huquqiga ega bo‘ladi. Mazkur musobaqada yo‘llanmani qo‘lga kirita olmagan kurashchilar qit’aviy turnirlarda hamda dunyo saralash turnirida yo‘llanma uchun kurashib ko‘rishi mumkin bo‘ladi.
Izoh (0)