АҚШнинг Лас-Вегас шаҳрида 7—12-центабр кунлари ўтказиладиган жаҳон чемпионатида иштирок этувчи эркин, юнон-рим ва аёллар кураши бўйича Ўзбекистон терма жамоалари таркиби маълум бўлди. Бу ҳақда Ўзбекистон Миллий олимпия қўмитаси матбуот хизмати хабар берди.
Ўзбекистон терма жамоаси таркибидан жами 14 нафар спортчи — 7 нафар юнон-рим курашчиси, 5 нафар эркин курашчи ҳамда 2 нафар хотин-қизлар кураши вакиллари ўрин олган. Мазкур жаҳон чемпионати Рио-2016 Олимпиадаси йўлланмалари ўйналадиган дастлабки мусобақа ҳисобланади.
Жаҳон чемпионатининг юнон-рим кураши бўйича мусобақаларида Ўзбекистон номидан мураббийлар Камил Фаткуллин ва Рустам Қудратов қўл остида шуғулланаётган Элмурат Тасмурадов (-59 кг), Александр Лохов (-66 кг), Нурбек Холмуҳамматов (-71 кг), Нурбек Ҳошимбеков (-75 кг), Бесики Солдадзе (-80 кг), Рустам Ассакалов (-85 кг), Жаҳонгир Турдиев (-98 кг) қатнашади.
Эркин кураш баҳсларида (мураббийлар — Александр Недорезов, Убайдулла Тоиров) Маҳмуджон Шавкатов (-57 кг), Ихтиёр Наврўзов (-65 кг), Бекзод Абдураҳмонов (-70 кг), Рашид Қурбонов (-74 кг), Умиджон Исманов (-86 кг), аёллар курашида эса (мураббий — Аҳмет Кагарманов) Даулетбике Яхшимуратова (-48 кг) ва Зуҳра Мустанова (-53 кг) Ўзбекистон шарафини ҳимоя қилади.
ЖЧ—2015 ҳакамлари таркибидан Константин Михайлов ва Тоҳир Ғуломов каби ўзбекистонлик мутахассислар ўрин эгаллаган.
Жаҳон чемпионатида ўз вазн тоифасида 1—6-ўринларни эгаллаган спортчилар Олимпиада ўйинларида иштирок этиш ҳуқуқига эга бўлади. Мазкур мусобақада йўлланмани қўлга кирита олмаган курашчилар қитъавий турнирларда ҳамда дунё саралаш турнирида йўлланма учун курашиб кўриши мумкин бўлади.