Juliano Stroye jahondagi eng kuchli bolakay hisoblanadi. U 2004-yil 18-iyul kuni Ruminiyada tug‘ilgan, 2009-yilda — atigi besh yoshida u butun dunyoga tanildi va Ginnesning rekordlar kitobidan o‘rin oldi. “Sports.ru”ning yozishicha, u murakkab tryukni bajarib — oyoqlari orasiga og‘irligi 15 kilogramm bo‘lgan gimnastikachilar to‘pini qistirgancha, o‘n metr masofani qo‘lda bosib o‘tib, Rekordlar kitobidan joy olgan.
Jahondagi eng kuchli bolakay ikki yoshligidayoq otasi nazorati ostida sport bilan shug‘ullanishni boshlagan. Julianoning otasi, o‘z vaqtida gimnastikachi-sportchi bo‘lgan Iulien Stroye farzandini har doim o‘zi bilan trenajyor zaliga olib borardi. Ular dastlab oddiy mashqlarni bajarishdan boshlab, so‘ng nisbatan murakkab mashg‘ulotlarga kirishgan.
Hozirgi vaqtda jahonning eng kuchli bolakayi ko‘plab musobaqalar va sport tomoshalarida qatnashmoqda. Bundan tashqari, Juliano Stroye 2013-yildan beri Ginnesning rekordlar kitobi uchun yangidan-yangi rekordlarni o‘rnatishdan charchamayapti. U so‘nggi tryuklaridan birida yerga parallel ravishda joylashtirilgan yog‘och qoziqlarga tayangan holda mashqlarni bajardi. Juliano mazkur mashqni 20 marta bajarib, biror marta ham oyog‘i bilan yerga teginmadi.
Iulienning ta’kidlashicha, Juliano oddiy bolalardek hayot kechiradi. U har doim o‘zi istagan miqdorda shug‘ullanadi. Mashg‘ulotlardan bo‘sh vaqtida esa o‘ynaydi, rasm chizadi, multfilmlar tomosha qiladi va tengdoshlari bilan muloqotda bo‘ladi.
Izoh (0)