AQSh yo‘llari elektr energiyasi ishlab chiqaruvchi quyosh panellariga aylanadi

Aydaxo shtatida istiqomat qiluvchi er-xotin Amerika yo‘llarini katta quyosh paneliga aylantirish usulini topdi. Loyiha mualliflari fikriga ko‘ra, Amerikadagi 48 shtatda mavjud 31 251 kvadrat mil yo‘llar, avtoturargohlar, maydonlar, piyodalar va velosipedchilar yo‘laklari kelgusida ulkan miqyosdagi elektr energiyasi ishlab chiqarishga qodir. Bu haqda Business Insider nashriga tayanib, “Tjournal.ru” xabar berdi.

Solar Roadways deya nom olgan loyiha mualliflari  Juliya va Skott Brushou 10 yil davomida eng katta bosimga ham dosh bera oladigan panellar tizimi ustida ish olib bordi. Ular panelni qoplash uchun nafaqat katta og‘irlikni ko‘taradigan, balki avtomobil g‘ildiraklari tirkalib turishi uchun ham moslashtirilgan maxsus oyna formulasini topganini ta’kidlamoqda.

Hisob-kitoblarga ko‘ra, ushbu tizim quvvati yuqori darajaga yetganda AQSh aholisi ayni paytda ishlatayotgan elektr energiyasidan uch barobar ortig‘ini ishlab chiqarishga qodir. Shuningdek, elektr transporti vositalarini yo‘llarda o‘rnatiladigan maxsus jihozlar yordamida to‘yintirish ham mumkin bo‘ladi.

Loyiha AQSh Katta yo‘llar federal boshqarmasidan moliyalashtirish jarayonida ikki bosqichdan o‘tdi.