Janubiy afrikalik Derek Xusen ilk avtomobilini 23 yoshida, 1993-yilning fevralida sotib olgandi. “TASS”ning xabar berishicha, o‘sha yilning oktabrida uning Toyota Corolla’si o‘g‘irlab ketilgan.
“Men darhol politsiyaga xabar bergandim, biroq mashina topilmadi. Mashinani sug‘urta qildirmagandim, shu sababli hech qanday tovon puli ham ololmadim”, — deb xotirlaydi Xusen. Oradan 22 yil o‘tib, Xusenga politsiyadan qo‘ng‘iroq qilib, mashinani olib ketishni so‘rashdi. 45 yoshli jabrlanuvchi esa mashinasi yaxshi saqlanganidan hayratda qoldi.
“Aql bovar qilmaydi. Odatda o‘g‘irlanganidan keyin topilgan avtomobillarga qarab bo‘lmaydi. Buning holati esa a’lo darajada. Men uni qaytadan bo‘yab, haydab yuraman. Politsiyachi Ntokolega katta rahmat!”, — dedi Xusen.
JARda jinoyatlar soni bo‘yicha avtomobil o‘g‘irlash uy va idoralarni tunashdan keyin uchinchi o‘rinda turadi, shu sababli ham yo‘llarda tez-tez reydlar o‘tkazib turiladi. Xusenning dvigatel va shassi raqami o‘chirib tashlangan mashinasi esa 2014-yil noyabrida to‘xtatib, hibsga olingandi. Politsiyachi Kvakva Ntokole avtomobilning haqiqiy raqamlarini aniqlab, egasini topish uchun yarim yildan ko‘proq vaqt sarfladi.
Izoh (0)