Жанубий африкалик Дерек Хусен илк автомобилини 23 ёшида, 1993 йилнинг февралида сотиб олганди. «ТАСС»нинг хабар беришича, ўша йилнинг октябрида унинг Toyota Corolla’си ўғирлаб кетилган.
«Мен дарҳол полицияга хабар бергандим, бироқ машина топилмади. Машинани суғурта қилдирмагандим, шу сабабли ҳеч қандай товон пули ҳам ололмадим», — деб хотирлайди Хусен. Орадан 22 йил ўтиб, Хусенга полициядан қўнғироқ қилиб, машинани олиб кетишни сўрашди. 45 ёшли жабрланувчи эса машинаси яхши сақланганидан ҳайратда қолди.
«Ақл бовар қилмайди. Одатда ўғирланганидан кейин топилган автомобилларга қараб бўлмайди. Бунинг ҳолати эса аъло даражада. Мен уни қайтадан бўяб, ҳайдаб юраман. Полициячи Нтоколега катта раҳмат!», — деди Хусен.
ЖАРда жиноятлар сони бўйича автомобиль ўғирлаш уй ва идораларни тунашдан кейин учинчи ўринда туради, шу сабабли ҳам йўлларда тез-тез рейдлар ўтказиб турилади. Хусеннинг двигатель ва шасси рақами ўчириб ташланган машинаси эса 2014 йил ноябрида тўхтатиб, ҳибсга олинганди. Полициячи Кваква Нтоколе автомобилнинг ҳақиқий рақамларини аниқлаб, эгасини топиш учун ярим йилдан кўпроқ вақт сарфлади.
Изоҳ (0)