Polshaning eng badavlat odami Yan Kulchik vafot etdi. Reuters agentligi Kulczyk Holding rasmiy vakili Marta Visotskaga asoslanib xabar berishicha, milliarder jarrohlik amaliyotidan so‘ng, 65 yoshida vafot etgan.
Agentlik manbasining so‘zlariga ko‘ra, Kulchik reja bo‘yicha xorijda davolanayotgan edi. Polshaning TVN24 telekanali xabariga ko‘ra, ishbilarmon Avstriya poytaxti Venada vafot etgan.
Forbes ma’lumotlariga ko‘ra, Kulchikning boyligi 3,9 milliard dollarga teng edi. Ciech kimyo kompaniyasi, energetika sohasidagi Polenergia va Serinus Energy shirkatlari, bir qator neft va gaz firmalari hamda pivo ishlab chiqaruvchi SABMiller kompaniyasida milliarderning ulushi bor edi.
Milliarderning birinchi nikohidan ikki farzandi — Dominika va Sebastyan bor. O‘g‘li 2013-yili Kulczyk Investments ijrochi direktori etib tayinlangach, otasining ishlarini yuritib kelayotgan edi.
Izoh (0)