Pokistonning Muzaffargarh shahrida faoliyati taqiqlangan “Lashkari Jhangvi” guruhi yetakchisi, uning ikki o‘g‘li va 11 nafar jangari politsiya tomonidan yo‘q qilindi. Bu haqda The Express Tribune nashri xabar bermoqda.
Hodisa aksilterror xizmati xodimlari Malik Is’hoq va uning o‘g‘illarini yashirin qurol-yarog‘ omborini aniqlash maqsadida Muzaffargarhga olib kelganidan so‘ng yuz berdi. 29-iyul kuni tongda qamoqxonaga qaytishi vaqtida politsiya karvoni Is’hoqni ozod etishga shaylangan qurollangan mototsiklchilar hujumiga uchradi. Otishma natijasida olti nafar politsiyachi yaralandi.
Mahalliy politsiya rasmiy vakili Nabila G‘azanfarning so‘zlariga ko‘ra, hujumda 12—15 nafar jangari qatnashgan. G‘azanfarning ta’kidlashicha, jangarilar Is’hoqni qutqarib, mototsikllarda yashirinishga uringan, biroq politsiya xodimlari ularni ta’qib etib, bir necha nafarini otib o‘ldirgan.
Is’hoq AQSH tomonidan qidirilayotgan terrorchilardan biri hisoblanadi. Uning shialarga qarshi kurashuvchi “Lashkari Jhangvi” guruhi yuzlab tinch aholi vakillarining o‘limiga javobgardir. Jangarilar yetakchisi bir necha bor sud qilingan, biroq har safar, guvohlarning unga qarshi ko‘rsatma berishdan bosh tortishi sabab, oqlab kelingan. So‘nggi bor u 25 iyul kuni, ikki o‘g‘li bilan birga hibsga olingandi.
Izoh (0)