Texnologik kompaniyalarga sarmoya kiritish ortidan 3,2 milliard dollar ishlab topgan rossiyalik milliarder Yuriy Milner yaqin 10 yil davomida Yerdan tashqaridagi sivilizatsiyalarni izlash bo‘yicha loyihaga 100 million dollar sarflashni rejalashtirmoqda. Bu haqda The New York Times xabar bermoqda.
Investorning hamkori sifatida bungacha boshqa sayyoralar bilan aloqa o‘rnatish harakatlarini bir necha bor tanqid ostiga olgan professor Stiven Xoking ishtirok etmoqda, qidiruv ishlariga esa shunga o‘xshash loyihani 1960-yilda ishga tushirgan Frenk Dreyk rahbarlik qiladi.
Tadqiqotchilarning fikricha, ijobiy natijaga umid bor, ularning bu loyihasiga istalgan inson — oddiy havaskordan tortib olim odamgacha hamma qo‘shilishi mumkin.
Yuriy Milnerning so‘zlariga ko‘ra, hayotida sodir bo‘lgan bir qator voqealar uning mazkur loyihaga bosh qo‘shishiga turtki bo‘lgan. Birinchidan, ota-onasi uni birinchi kosmonavt Yuriy Gagarin sharafiga nomlagan.
Ikkinchidan, bolaligida o‘qigan yozuvchi Iosif Shklovskiyning “Olam, hayot, aql” kitobi uni Moskva davlat universitetining fizika fakultetiga o‘qishga kirishga undagan. Uchinchidan, 1987-yili Milner Rossiya Fanlar akademiyasining Fizika institutiga ma’ruzaga kelgan Stiven Xoking bilan tanishgan.
“Men hatto o‘sha ma’ruzadan suratlarni ham topdim. Endi esa biz birgalikda yangi loyihamizni ishga tushirayotganimiz haqida e’lon qilyapmiz”, — dedi Yuriy Milner. Loyiha taqdimoti Xoking istiqomat qiladigan Londonda bo‘ladi.
Izoh (0)