Plyaj futboli bo‘yicha JChdagi Senegal — Portugaliya o‘yinini o‘zbekistonlik Baxtiyor Namozov boshqardi

Portugaliyada bo‘lib o‘tayotgan plyaj futboli bo‘yicha jahon chempionati guruh bosqichining ikkinchi tur o‘yinlari doirasida 11-iyul kuni Senegal terma jamoasi musobaqa mezboni — Portugaliya bilan bahs olib bordi.

Ushbu uchrashuvni o‘zbekistonlik hakam Baxtiyor Namozov boshqarib bordi. Mazkur chempionat Baxtiyor Namozov uchun ikkinchi mundialdir. U bunga qadar 2013-yili Taitida bo‘lib o‘tgan Jahon chempionatiga chaqiruv olib, jami 7 ta o‘yinda ishlagan.

Namozov barcha qit’aning eng kuchli terma jamoalari ishtirokida har yili an’anaviy tarzda o‘tkaziladigan Qit’alararo Kubok o‘yinlarida, shuningdek, Osiyo chempionatlarida ham hakam sifatida ishtirok etgan, deb yozadi O‘zbekiston futbol federatsiyasi matbuot xizmati.

Senegal va Portugaliya o‘rtasidagi bahs 6:5 hisobida afrikaliklar foydasiga hal bo‘ldi. Baxtiyor Namozov uchrashuvda 3 marta sariq kartochka ko‘rsatdi, bir vaziyatda esa mezbonlar futbolchisini maydondan chetlatdi.