Yangi Zelandiyada 67 yil birga yashagan er-xotin bir kunda, bir necha soat farq bilan, hayotdan ko‘z yumdi. Vesti.ru’ning xabar berishicha, 94 yoshli Xyu Nis va uning 92 yoshli ayoli – Joan, tabiiy sabablarga ko‘ra, uyqu vaqtida vafot etdi.
Xabar berishlaricha, pensionerlarning salomatligi so‘nggi vaqtlarda yomonlashgan edi. So‘nggi uch oy davomida ular o‘z xonasidan chiqmagan. “Ular birga vafot etishni xohlayotganliklarini aytishgandi, biroq haqiqatan ham shunday bo‘lishini kutmagandim”, - dedi juftlikning qizi Joy Rid.
Xyu va Joan 1940-yillarda uchrashishgan va shundan beri kamdan-kam ayri holda yashashgan. Xyu baptistlar cherkovida ruhoniy bo‘lgan va ayoli bilan birga turli vaqtlarda Yangi Zelandiyaning turli shaharlarida, shuningdek, Papua-Yangi Gvineyada yashagan. Joan eriga cherkov ishlarida yordam berardi.
“Ular nafaqat bir ish bilan shug‘ullanishardi, balki bir-birlarini ham qattiq sevishardi. Ular Xudoga va nikoh bir umrga qurilishiga qattiq ishonishardi”, - dedi ularning qizi Joy Rid.
Izoh (0)