Янги Зеландияда 67 йил бирга яшаган эр-хотин бир кунда, бир неча соат фарқ билан, ҳаётдан кўз юмди. Vesti.ru’нинг хабар беришича, 94 ёшли Хью Нис ва унинг 92 ёшли аёли – Жоан, табиий сабабларга кўра, уйқу вақтида вафот этди.
Хабар беришларича, пенсионерларнинг саломатлиги сўнгги вақтларда ёмонлашган эди. Сўнгги уч ой давомида улар ўз хонасидан чиқмаган. «Улар бирга вафот этишни хоҳлаётганликларини айтишганди, бироқ ҳақиқатан ҳам шундай бўлишини кутмагандим», - деди жуфтликнинг қизи Жой Рид.
Хью ва Жоан 1940-йилларда учрашишган ва шундан бери камдан-кам айри ҳолда яшашган. Хью баптистлар черковида руҳоний бўлган ва аёли билан бирга турли вақтларда Янги Зеландиянинг турли шаҳарларида, шунингдек, Папуа-Янги Гвинеяда яшаган. Жоан эрига черков ишларида ёрдам берарди.
«Улар нафақат бир иш билан шуғулланишарди, балки бир-бирларини ҳам қаттиқ севишарди. Улар Худога ва никоҳ бир умрга қурилишига қаттиқ ишонишарди», - деди уларнинг қизи Жой Рид.
Изоҳ (0)