2011-yil 2-mayda yo‘q qilingan terrorchi Usama ben Ladenning o‘g‘li AQSh hukumatiga murojaat qilib, otasining o‘limini tasdiqlovchi hujjatlarni taqdim etishni so‘ragan, deb xabar beradi “TASS”.
Bu haqda WikiLeaks sayti tomonidan AQShning Saudiya Arabistonidagi elchixonasiga tegishli hujjatlar chop qilinganidan keyin ma’lum bo‘ldi.
AQShning Ar-Riyoddagi bosh konsuli Glen Kayzer tomonidan Abdulla ben Ladenga maktub 2011-yil 9-sentabrda jo‘natilgan.
“Men sizni otangiz Usama ben Ladenning o‘lganini tasdiqlovchi guvohnomani olish haqidagi so‘rovingizni oldim. AQSh davlat departamentining huquqiy ekspertlari o‘lim haqidagi guvohnoma chiqarilmaganligini ma’lum qildi. Bu harbiy operatsiyalar vaqtida o‘lgan shaxslar bilan bo‘lib turadigan odatiy hol”, — deb yozgan konsul.
Kayzer o‘lim haqidagi guvohnomaning o‘rniga Abdulla ben Ladenga Amerika yustitsiyasi tomonidan berilgan, uning otasini o‘lganligi va birinchi raqamli terrorchini qidirish ishlari to‘xtatilganligini tasdiqlovchi hujjat taqdim etgan.
“Umid qilamanki, AQSh ma’muriyatining bu hujjatlari siz va oilangiz uchun foydali bo‘ladi”, — deb konsul o‘z maktubini tugatgan.
Izoh (0)