Checheniston rahbari Ramzan Qodirov Forbes jurnaliga “Sever” batalyoni xizmatchisi Ruslan Geremeyev siyosatchi Boris Nemsovning o‘limiga aloqasi yo‘qligini ma’lum qildi, deb yozadi Meduza. “U na ko‘prik ustida, na uning yonida va na qotillik hududida bo‘lgan”, — dedi u.
Qodirov ma’lum qilishicha, Geremeyevning qarindoshlari u sudga “adolatli munosabat bo‘lgan taqdirda” kelishga tayyorligini aytgan.
“Rosbalt” ma’lumotlariga ko‘ra, ayni paytda Ruslan Geremeyev Rossiyadan tashqarida; unga nisbatan qidiruv e’lon qilingan.
Boris Nemsov 28-fevralga o‘tar kechasi o‘ldirib ketilganidan bir necha kun o‘tgach, besh kishi, jumladan “Sever” batalyoni xizmatchisi Zaur Dadayev hibsga olingan edi. Tergovda aeroportdan olingan 1-martga tegishli yozuvlar bo‘lib, unda Dadayev, Geremeyev va Ruslan Muxudinovni ko‘rish mumkin.
Zaur Dadayev Moskvada Geremeyev bilan bir xonadonda yashagan. Ruslan Geremeyev Davlat dumasi deputati Adam Delimxanov va Chechenistondan senator Sulaymon Geremeyevning jiyanidir.
Izoh (0)