Turkiya sobiq prezidenti va bosh vaziri Sulaymon Demirelning vafoti munosabati bilan mamlakatda uch kunlik motam e’lon qilindi. Bu haqda, Turkiya bosh vaziri Ahmet Davuto‘g‘luga asoslanib, “RIA Novosti” xabar bermoqda.
Sulaymon Demirel chorshanba kuni 91 yoshida Anqaradagi kasalxonalardan birida vafot etdi. Anadolu agentligi xabariga ko‘ra, mamlakatning sobiq yetakchisi yurak xastaligidan vafot etgan.
Jurnalistlar oldida chiqish qilarkan, Turkiya hukumatining amaldagi rahbari Ahmet Davuto‘g‘li Demirelning o‘limi munosabati bilan 17-iyundan e’tiboran uch kunlik milliy motam e’lon qilinishini bildirdi.
Turkiya prezidenti Rajab Toyib Erdo‘g‘an va bosh vazir Demirelning o‘limi munosabati bilan uning yaqinlari va Turkiya xalqiga hamdardlik bildirdi. “Turkiya tarixida chuqur iz qoldirgan va mamlakat rivojiga ko‘mak bergan Sulaymon Demirel siyosiy tariximizdagi eng muhim shaxslardan biridir”, - dedi Erdo‘g‘an.
Sulaymon Demirel 1924-yil 1-noyabr kuni tug‘ilgan bo‘lib, Turkiya Adolat partiyasi asoschilaridan biri hisoblanadi. 1993-2000-yillar davomida u Turkiya prezidenti bo‘lgan, shuningdek, besh marta bosh vazir lavozimiga tayinlangan. Demirelning dafn marosimi 19-iyun kuni Anqarada bo‘lib o‘tadi.
Izoh (0)