O‘zbekiston sportining ko‘zgusi hisoblangan Olimpiya shon-shuhrati muzeyida har yili an’anaviy tarzda o‘tkazilib kelinadigan “Olimpiya kuni” keng nishonlandi, deb xabar beradi O‘zbekiston Milliy olimpiya qo‘mitasi matbuot xizmati.
2015-yilgi sport bayramida Xalqaro olimpiya qo‘mitasi prezidenti Tomas Bax va Milliy olimpiya qo‘mitalari assotsiatsiyasi rahbari, Osiyo olimpiya kengashi prezidenti Ahmad al-Saboh bevosita ishtirok etdi. Bundan tashqari bu yilgi “Olimpiya kuni”da qilichbozlik, taekvondo, akrabatika, dzyudo, kamondan otish, yengil atletika, shuningdek, kurash va o‘zbek jang san’ati kabi milliy sport turlari bo‘yicha musobaqalar bo‘lib o‘tdi.
“Olimpiya kuni”ning ochilish marosimida Tomas Bax, Ahmad al-Saboh va O‘zbekiston Milliy olimpiya qo‘mitasi raisi, senator Mirabror Usmonov so‘zga chiqdi. Shundan so‘ng musobaqalarga start berildi. Mazkur musobaqalar yakunlariga ko‘ra yuqori natijalarni qayd etgan sportchilarga tashkilotchilar tomonidan ta’sis etilgan diplom va esdalik sovg‘alari tantanali suratda topshirildi.
Ma’lumot uchun. Butunjahon Olimpiya kunini nishonlash xaqidagi qaror — 1948-yilning yanvar oyida Sent-Morich shahri (Shveysariya)da o‘tkazilgan XOQning 42-sessiyasida qabul qilingan. Olimpiya kuni ilk bor 1948-yilning 23-iyunida Avstraliya, Belgiya, Kanada, Buyuk Britaniya, Gretsiya, Portugaliya, Shveysariya, Urugvay va Venesuela Milliy Olimpiya qo‘mitalari tomonidan nishonlangan.
Mazkur sport bayrami qariyb 60 yil davomida “Olimpiya yugurish kuni” sifatida o‘tkazilib kelingan. 2009-yilga kelib XOQning o‘sha paytdagi rahbari Jak Roggening taklifi hamda Xalqaro Olimpiya qo‘mitasining qaroriga ko‘ra “Olimpiya yugurish kuni” – “Olimpiya kuni” deb o‘zgartirildi.
Bugungi kunga kelib “Olimpiya kuni” dunyoda eng ommaviy tarzda nishonlanadigan sport bayramlaridan biriga aylangan. Har yili Xalqaro Olimpiya qo‘mitasiga a’zo 205 davlatda o‘tkaziladigan sport va salomatlik bayramida millionlab insonlar bevosita ishtirok etmoqda. O‘zbekiston Milliy Olimpiya qo‘mitasi 23 yildirki Xalqaro Olimpiya qo‘mitasi tashabbusini qo‘llab-quvvatlagan holda, O‘zbekistonda “Olimpiya kuni”ni keng nishonlab kelyapti.
Izoh (0)