Ўзбекистон спортининг кўзгуси ҳисобланган Олимпия шон-шуҳрати музейида ҳар йили анъанавий тарзда ўтказилиб келинадиган «Олимпия куни» кенг нишонланди, деб хабар беради Ўзбекистон Миллий олимпия қўмитаси матбуот хизмати.
2015 йилги спорт байрамида Халқаро олимпия қўмитаси президенти Томас Бах ва Миллий олимпия қўмиталари ассоциацияси раҳбари, Осиё олимпия кенгаши президенти Аҳмад ал-Сабоҳ бевосита иштирок этди. Бундан ташқари бу йилги «Олимпия куни»да қиличбозлик, таэквондо, акрабатика, дзюдо, камондан отиш, енгил атлетика, шунингдек, кураш ва ўзбек жанг санъати каби миллий спорт турлари бўйича мусобақалар бўлиб ўтди.
«Олимпия куни»нинг очилиш маросимида Томас Бах, Аҳмад ал-Сабоҳ ва Ўзбекистон Миллий олимпия қўмитаси раиси, сенатор Мираброр Усмонов сўзга чиқди. Шундан сўнг мусобақаларга старт берилди. Мазкур мусобақалар якунларига кўра юқори натижаларни қайд этган спортчиларга ташкилотчилар томонидан таъсис этилган диплом ва эсдалик совғалари тантанали суратда топширилди.
Маълумот учун. Бутунжаҳон Олимпия кунини нишонлаш хақидаги қарор — 1948 йилнинг январь ойида Сент-Морич шаҳри (Швейцария)да ўтказилган ХОҚнинг 42-сессиясида қабул қилинган. Олимпия куни илк бор 1948 йилнинг 23 июнида Австралия, Бельгия, Канада, Буюк Британия, Греция, Португалия, Швейцария, Уругвай ва Венесуэла Миллий Олимпия қўмиталари томонидан нишонланган.
Мазкур спорт байрами қарийб 60 йил давомида «Олимпия югуриш куни» сифатида ўтказилиб келинган. 2009 йилга келиб ХОҚнинг ўша пайтдаги раҳбари Жак Роггенинг таклифи ҳамда Халқаро Олимпия қўмитасининг қарорига кўра «Олимпия югуриш куни» – «Олимпия куни» деб ўзгартирилди.
Бугунги кунга келиб «Олимпия куни» дунёда энг оммавий тарзда нишонланадиган спорт байрамларидан бирига айланган. Ҳар йили Халқаро Олимпия қўмитасига аъзо 205 давлатда ўтказиладиган спорт ва саломатлик байрамида миллионлаб инсонлар бевосита иштирок этмоқда. Ўзбекистон Миллий Олимпия қўмитаси 23 йилдирки Халқаро Олимпия қўмитаси ташаббусини қўллаб-қувватлаган ҳолда, Ўзбекистонда «Олимпия куни»ни кенг нишонлаб келяпти.
Изоҳ (0)