Xalqaro olimpiya qo‘mitasi prezidenti Tomas Bax hamda Milliy olimpiya qo‘mitalari assotsiatsiyasi prezidenti, Osiyo Olimpiya kengashi rahbari Shayx Ahmad al-Fahad al-Saboh boshchiligidagi delegatsiya a’zolari Toshkent markazida bunyod etilgan O‘zbekiston Milliy olimpiya qo‘mitasining yangi binosiga tashrif buyurdi. Bu haqda O‘zbekiston Milliy olimpiya qo‘mitasi matbuot xizmati xabar bermoqda.
“Yurtingizda Milliy olimpiya qo‘mitasining yangi binosi qad rostlayotgani haqida xabarim bor edi. Ochig‘ini aytaman bunday ko‘rkam, mahobatli olimpiya qo‘mitasini ko‘rib, nafaqat meni, balki delegatsiyamizning barcha a’zolarini hayratini oshirdi. Ushbu binoda joylashgan Respublika tibbiy-biologik markaz ham dunyoda men bilgan tibbiy-biologik markazlar orasida eng yaxshilaridan. Bu yerda eng so‘nggi tibbiy uskunalar o‘rnatilganligini ko‘rib, hayratim ikki hissa oshdi. Shundan kelib chiqib, O‘zbekiston Milliy olimpiya qo‘mitasining yangi binosi dunyoda tengsiz, desam aslo mubolag‘a qilmagan bo‘laman”, — dedi Tomas Bax.
“Bundan ikki yil avval O‘zbekistonga kelganimda Milliy olimpiya qo‘mitasining yangi binosi maketini ko‘rgan edim. O‘shanda bu bino me’moriy yechimi jihatidan ham, u yerda yaratilgan sharoitlar ham juda puxta ishlab chiqilganligiga ishonch hosil qilgan edim. Ochig‘i, juda qisqa fursatda bunday zamonaviy binoni bunyod etilganligini qo‘rib hayratlandim. So‘nggi bor yurtingizga tashrif buyurganimda O‘zbekiston Milliy olimpiya qo‘mitasining yangi binosi qisqa fursatda barpo etilib, foydalanishga topshirilishini eshitib, to‘g‘risi ko‘pam ishonmagan edim. Biroq, bugun ana shu saroyni qad rostlaganligini, qad rostlaganda ham haqiqiy saroy bo‘lganligini ko‘rib, o‘zbekistonliklar bir so‘zli bo‘lishligiga yana bir bor amin bo‘ldim”, — deydi Shayx Ahmad al-Fahad al-Saboh.
O‘zbekiston Milliy olimpiya qo‘mitasi binosiga tashrif buyurgan martabali mehmonlar bu yerdan yaratilgan sharoitlar, ayniqsa, o‘ziga xos tarzda tashkil etilgan muzey, majlislar zali, tibbiy-biologik markaz o‘zgacha taassurot qoldirganligini e’tirof etdi.
Izoh (0)