Xitoyda “Temir odam” uslubida bezaklangan Samsung Galaxy S6 Edge smartfoni rekord darajadagi narxga baholandi. Cheklangan miqdorda chiqarilgan smartfon nusxasi 12-iyun kuni bo‘lib o‘tgan kimoshdi savdoda 569 ming yuan (taxminan 91 ming dollar)ga sotildi, deya xabar bermoqda Android Headlines.
Qurilma Xitoyning eng yirik onlayn-riteylerlaridan biri – JD.com’da sotuvga qo‘yilgandi. Auksion doirasida 92 mingdan ortiq ariza kelib tushdi. Xaridorlarning bu qadar katta qiziqishiga nafaqat Galaxy S6 Edge’ning ommabopligi va “Temir odam”ning mashhurligi, ayni vaqtda, Xitoy an’ana va udumlari ham sabab bo‘lgan.
Smartfon Marvel Comics nashriyoti qahramonlaridan biri – “Temir odam”ning qizil-tillarang libosi uslubida bezaklangan. Bunday ko‘rinishdagi qurilmaga Xitoyda talab juda katta, chunki aynan shu ranglar xitoyliklar orasida boylik va hasham ramzi hisoblanadi. JD.com’ga shunday bezaklangan smartfonlarning dastlabki mingtasi sotuvga qo‘yilganida, sayt arizalar ko‘pligidan ishlamay qoldi.
Bundan tashqari, Xitoy madaniyatida olti raqami omadni bildiradi. Sotuvga qo‘yilgan smartfonning nafaqat nomida bu raqam bor, ayni vaqtda, u cheklangan partiyaning 66-seriyasi ham hisoblanadi.
Izoh (0)