Хитойда «Темир одам» услубида безакланган Samsung Galaxy S6 Edge смартфони рекорд даражадаги нархга баҳоланди. Чекланган миқдорда чиқарилган смартфон нусхаси 12 июнь куни бўлиб ўтган кимошди савдода 569 минг юань (тахминан 91 минг доллар)га сотилди, дея хабар бермоқда Android Headlines.
Қурилма Хитойнинг энг йирик онлайн-ритейлерларидан бири – JD.com’да сотувга қўйилганди. Аукцион доирасида 92 мингдан ортиқ ариза келиб тушди. Харидорларнинг бу қадар катта қизиқишига нафақат Galaxy S6 Edge’нинг оммабоплиги ва «Темир одам»нинг машҳурлиги, айни вақтда, Хитой анъана ва удумлари ҳам сабаб бўлган.
Смартфон Marvel Comics нашриёти қаҳрамонларидан бири – «Темир одам»нинг қизил-тилларанг либоси услубида безакланган. Бундай кўринишдаги қурилмага Хитойда талаб жуда катта, чунки айнан шу ранглар хитойликлар орасида бойлик ва ҳашам рамзи ҳисобланади. JD.com’га шундай безакланган смартфонларнинг дастлабки мингтаси сотувга қўйилганида, сайт аризалар кўплигидан ишламай қолди.
Бундан ташқари, Хитой маданиятида олти рақами омадни билдиради. Сотувга қўйилган смартфоннинг нафақат номида бу рақам бор, айни вақтда, у чекланган партиянинг 66-серияси ҳам ҳисобланади.
Изоҳ (0)