Janubiy Koreyada Yaqin Sharq respirator sindromi koronavirusi (MERS) qurbonlari soni yetti nafarga yetdi. Yonhap axborot agentligi xabariga ko‘ra, virusni yuqtirib olganlar soni hozircha 95 nafarni tashkil etmoqda.
Reuters ma’lumotlariga ko‘ra, virus tarqalishining oldini olish maqsadida Janubiy Koreya bo‘ylab ikki mingdan ortiq ta’lim muassasalari, xususan, 20ta universitet vaqtincha yopilgan. Virus bilan zararlanganlarni 35 kasalxona qabul qilgan.
Virus Janubiy Koreyadan tashqari Yaqin Sharqning bir qator mamlakatlari, xususan, Saudiya Arabistoni, Qatar va BAAga ham daxl qilgan. Gongkong sayyohlik kengashi Janubiy Koreyaga 30-iyunga qadar bo‘lgan barcha (kruizlardan tashqari) sayohatlarni bekor qildi. Bu taqiq 10-12 ming sayyohni qamrab oladi.
MERS koronavirusi nafas yo‘li organlari orqali, havodan yuquvchi kasallik bo‘lib, hozirgi vaqtda unga qarshi hech qanday dori vositasi ishlab chiqilmagan. Ushbu virus ilk bor 2012-yili Saudiya Arabistonida aniqlangan, 2015-yil mayida esa mazkur virusni Yaqin Sharqdan qaytgan koreyalik ishbilarmon Janubiy Koreyaga olib kirgan.
Jahon sog‘liqni saqlash tashkiloti ma’lumotlariga ko‘ra, shu kungacha jahon bo‘ylab MERS bilan 1244 kishi zararlangani, ularning 446 nafari vafot etgani qayd etilgan.
Izoh (0)