Жанубий Кореяда Яқин Шарқ респиратор синдроми коронавируси (MERS) қурбонлари сони етти нафарга етди. Yonhap ахборот агентлиги хабарига кўра, вирусни юқтириб олганлар сони ҳозирча 95 нафарни ташкил этмоқда.
Reuters маълумотларига кўра, вирус тарқалишининг олдини олиш мақсадида Жанубий Корея бўйлаб икки мингдан ортиқ таълим муассасалари, хусусан, 20та университет вақтинча ёпилган. Вирус билан зарарланганларни 35 касалхона қабул қилган.
Вирус Жанубий Кореядан ташқари Яқин Шарқнинг бир қатор мамлакатлари, хусусан, Саудия Арабистони, Қатар ва БААга ҳам дахл қилган. Гонгконг сайёҳлик кенгаши Жанубий Кореяга 30 июнга қадар бўлган барча (круизлардан ташқари) саёҳатларни бекор қилди. Бу тақиқ 10-12 минг сайёҳни қамраб олади.
MERS коронавируси нафас йўли органлари орқали, ҳаводан юқувчи касаллик бўлиб, ҳозирги вақтда унга қарши ҳеч қандай дори воситаси ишлаб чиқилмаган. Ушбу вирус илк бор 2012 йили Саудия Арабистонида аниқланган, 2015 йил майида эса мазкур вирусни Яқин Шарқдан қайтган кореялик ишбилармон Жанубий Кореяга олиб кирган.
Жаҳон соғлиқни сақлаш ташкилоти маълумотларига кўра, шу кунгача жаҳон бўйлаб MERS билан 1244 киши зарарлангани, уларнинг 446 нафари вафот этгани қайд этилган.
Изоҳ (0)