ФИФА собиқ вице-президенти Жек Уорнер Гаити 2010 йили юз берган вайронкор зилзила оқибатларини бартараф этиш учун ажратилган маблағларни ўзлаштирганликда гумон қилинмоқда. Meduza.io’нинг хабар беришича, АҚШ маъмурияти мазкур йўналишда тегишли тергов ҳаракатларини олиб бормоқда.
Жиноят иши материалларида қайд этилишича, ФИФА ва Жанубий Корея футбол ассоциацияси томонидан Гаитидаги зилзила жабрланувчилари учун ажратилган 750 минг доллар миқдоридаги маблағ Уорнер назоратидаги ҳисоб-рақамларга қайта йўналтирилган ва унинг шахсий эҳтиёжлари учун сарфлаб юборилган.
Айни дамда Уорнер Тринидад ва Тобагодан АҚШга экстрадиция этилишини кутмоқда, АҚШда у коррупция айблови бўйича суд олдида чиқиш қилади. У ўзига қарши илгари сурилган барча айбловларни инкор этмоқда.
Маълумот учун, Жек Уорнер ФИФАдаги коррупция иши бўйича АҚШ томонидан олиб борилаётган тергов ҳаракатларида энг асосий айбланувчилардан биридир. Хусусан, уни 10 миллион доллар миқдоридаги маблағни талон-тарож этганликда гумон қилишмоқда. Умуман, мазкур иш бўйича ФИФАнинг жами 14 мансабдори гумон остига олинган.
Изоҳ (0)