Domodedovo aeroporti egalariga qarshi 2011-yilgi terakt tufayli jinoiy ish qo‘zg‘atildi

Domodedovo aeroporti egalariga nisbatan 2011-yilgi terakt bilan bog‘liq jinoyat ishi qo‘zg‘atildi, deya xabar bermoqda Meduza.

Ushbu terakt natijasida jabrlanganlar manfaatlarini himoya qilayotgan advokat Igor Trunov aytishicha, jinoyat ishi “xavfsizlik talablariga javob bermaydigan ishni bajarish yoki xizmat ko‘rsatish natijasida ikki yoki undan ortiq kishining o‘limini keltirib chiqarish” moddasi bo‘yicha qo‘zg‘atilgan.

“Eksport Menejment Kompani Limited” kompaniyasi sobiq rahbari Svetlana Trishina, “Domodedovo Erport Avieyshen Sekyurity” YoAJ sobiq boshqaruv direktori Andrey Danilov va aeroport kompleksi sobiq rahbari Vyacheslav Nekrasov ish figurantlari hisoblanadi.

Rossiya Tergov qo‘mitasi rasmiy vakili Domodedovo xo‘jayinlariga qarshi jinoyat ishi qo‘zg‘atilganini tasdiqladi.