Misr kassatsiya sudi sobiq prezident Husni Muborakni 2011-yilgi inqilob vaqtida namoyishchilarning o‘ldirilishi ishi bo‘yicha oqlash hukmi ustidan Bosh prokuratura bergan shikoyatni qanoatlantirdi. Bu haqda Segodnya.ua xabar bermoqda.
Ishni qayta ko‘rib chiqish bo‘yicha dastlabki sud mahkamasi 5-noyabr kuni bo‘lib o‘tadi. Ushbu ish bo‘yicha Muborak bilan birga Ichki ishlar vazirligining sobiq rahbari Habib al-Adliy va uning olti yordamchisi ham sudlanmoqda.
Eslatib o‘tamiz, 2012-yil 2-iyunida Misr sobiq prezidenti Husni Muborak va IIVning sobiq rahbari Habib al-Adliy umrbod ozodlikdan mahrum etilgan edi. Qohira sudi 2011-yil yanvaridagi inqilob vaqtidagi tinch aholining o‘limiga ularning aloqadorligi isbotlangan, deb hukm chiqargan edi.
Biroq 2013-yil yanvarida jinoyat ishlari bo‘yicha Misr sudi hukm ustidan Muborakning advokatlari bergan apellyatsiyani qanoatlantirdi. 2014-yil noyabrida esa Muborak va uning o‘g‘illaridan namoyishchilar o‘limi va korrupsiya jinoyatlari bo‘yicha barcha ayblovlar olib tashlandi.
IIVning sobiq rahbari va uning yordamchilari ham oqlandi, biroq bu qaror Misr aholisining keskin noroziligiga sabab bo‘ldi. Shundan so‘ng Bosh prokuratura, sud ishi davomida protsessual qoidabuzarliklarga yo‘l qo‘yilganini ma’lum qilib, sud hukmi ustidan shikoyat qildi.
Izoh (0)