Germaniya Federativ Respublikasining O‘zbekiston Respublikasidagi Favqulodda va Muxtor Elchisi Naythart Hyofer-Vissing 2015-yil 5-iyun kuni elchixonada bo‘lib o‘tadigan tantanali marosim doirasida Germaniyada nemis tilini o‘rganish, tahsil olish va tadqiqot ishlarini olib borish bo‘yicha joriy yil stipendiyalariga oid diplomlarni o‘z egalariga topshiradi. Bu haqda Germaniyaning Toshkentdagi Elchixonasi madaniyat va matbuot xizmati “Daryo”ga ma’lum qildi.
2015-yilda O‘zbekistondan jami 83 nafar talaba, o‘qituvchi va tadqiqotchilar Germaniya oliygohlari va tadqiqot institutlarida ilmiy izlanishlar olib borish bo‘yicha rag‘batlantiriladi.
Mazkur tadqiqot stipendiyalari yosh o‘zbek olimlarining Germaniya oliygohlarida ilmiy ishni yoqlash (PhD) niyatlarini rag‘batlantirishga, tadqiqot loyihalarini qo‘llab-quvvatlashga hamda o‘zbek olimlari va oliygoh o‘qituvchilarining Germaniya oliygohlari bilan tadqiqotlar borasidagi ilmiy almashinuviga xizmat qiladi. Germaniyada o‘qishga doir stipendiyalar magistratura yo‘nalishidagi ta’limni to‘liq moliyalashtirishga asoslangan.
Bundan tashqari, nemis tili bo‘yicha a’lo darajadagi bilimga ega o‘zbek talabalariga Germaniya oliygohlaridagi yozgi kurslarda ishtirok etish uchun ham bir qancha stipendiyalar ajratilgan. Ushbu stipendiyalar bir tomondan bakalavr va magistratura yo‘nalishidagi o‘zbek talabalari va ikkinchi tomondan Germaniya oliygohlari o‘rtasida til va madaniyatga yo‘naltirilgan o‘zaro almashinuvni maqsadli ravishda qo‘llab-quvvatlashga xizmat qiladi.
O‘zbekistonlik tadqiqotchilar, oliygohlar o‘qituvchilari, yosh olimlar va bilimli yoshlarning stipendiyalar taqdimoti orqali namoyon bo‘layotgan akademik rag‘batlantirilishi O‘zbekiston va Germaniya o‘rtasida madaniyat, ilm-fan, texnika va iqtisodiyot yo‘nalishidagi munosabatlarni istiqbolli rivojlantirishga hissa qo‘shadi.
Tantanali marosim doirasida O‘zbekiston Davlat jahon tillari universiteti qoshidagi 2-sonli akademik litsey, Samarqand Iqtisodiyot va servis instituti qoshidagi 1-sonli akademik litsey hamda Farg‘ona Davlat universiteti qoshidagi 3-sonli akademik litsey bitiruvchilariga Germaniya madaniyat vazirlari anjumanining nemis tili bo‘yicha jami 15 ta diplomi topshirildi. Xorijdagi maktablar bo‘yicha Germaniya markaziy boshqarmasi (ZfA) bilan hamkorlik qiladigan mazkur uch litseyda talabalar nemis tili bo‘yicha 2-darajali diplomni olish uchun xalqaro doirada tan olingan til imtihonini topshiradi. Ushbu daraja Xorijiy tillarni o‘rganish bo‘yicha umumyevropa standartlarining C1 darajasiga mos keladi va Germaniya oliy o‘quv yurtlarida tahsil olishda nemis tili borasida zarur bo‘lgan bilim mavjudligini tasdiqlovchi rasmiy hujjat sifatida xizmat qiladi. Litsey talabalari bu orqali o‘zlarining kasb va ta’limga oid kelgusi maqsadlarini amalga oshirish uchun muhim vositalardan biriga ega bo‘ldi.
Xorijdagi maktablar bo‘yicha Germaniya markaziy boshqarmasi O‘zbekistonda 1994-yildan boshlab maktab va litseylarni chuqurlashtirilgan nemis tili darslari o‘tishda qo‘llab-quvvatlab keladi va bu orqali “Maktablar: kelajak hamkorlari” tashabbusi doirasida O‘zbekistonda chet tili o‘qitilishinining takomillashtirilishiga o‘zining faol hissasini qo‘shib kelmoqda. ZfA bilan hamkorlik qiladigan ushbu maktab va akademik litseylarda jami 6400 nafarga yaqin o‘quvchi chet tili sifatida nemis tilini o‘rganmoqda.
Izoh (0)