U-16 Osiyo Chempionati—2016 hamda U-19 Osiyo Chempionati—2016 final bosqichlariga mezbonlik qiladigan mamlakatlar ma’lum qilindi, deb xabar beradi O‘zbekiston futbol federatsiyasi matbuot xizmati.
Unga ko‘ra 16 yoshgacha bo‘lgan futbolchilardan tashkil topgan terma jamoalar o‘rtasidagi Osiyo Chempionati kelasi yili Hindistonda o‘tkaziladigan bo‘ldi.
U-19 terma jamoalari o‘rtasidagi Osiyo Chempionati esa Baxraynda bo‘lib o‘tishi haqida qaror qilindi.
Ushbu musobaqalarning saralash bosqichlari o‘tkaziladigan hududlar esa 5 iyun kuni bo‘lib o‘tadigan qur’a tashlash marosimidan keyin ma’lum bo‘ladi.
Ta’kidlash kerakki, mezbonlar final bosqichiga to‘g‘ridan-to‘g‘ri yo‘llanmaga ega bo‘lganiga qaramay, Hindiston ham, Baxrayn ham saralash bosqichida qatnashishga qaror qildi.
U-16 Osiyo Chempionati saralash bosqichida jami 45 ta jamoa ishtirok etadi. Ular ikki mintaqaga bo‘linadi: G‘arbiy va Sharqiy. G‘arbiy mintaqada 24 ta, Sharqiy mintaqada esa 21 jamoa.
U-19 Osiyo Chempionati saralash bosqichida jami 43 jamoa ishtirok etadi. Ular ham ikki mintaqaga bo‘linadi: G‘arbiy va Sharqiy. G‘arb mintaqasida jamoalar soni 25 ta, Sharqda esa 18 ta.
O‘zbekistonning har ikki yoshdagi terma jamoalari ham ushbu saralash bahslarida ishtirok etadi. Hozirgi vaqtda O‘zbekiston U-16 terma jamoasiga Timur Olimxo‘jayev boshchilik qilayotgan bo‘lsa, U-19 terma jamoasida Jasur Abduraimov ish olib bormoqda.
Izoh (0)