Daniya poytaxti Kopengagen shahrida baydarka va kanoeda eshkak eshish bo‘yicha o‘tkazilgan Jahon kubogining uchinchi bosqichida O‘zbekiston terma jamoasi a’zolari 3 ta oltin, 3 ta kumush va 2 ta bronza medaliga sazovor bo‘lib, umumjamoa hisobida Germaniya terma jamoasidan so‘ng ikkinchi o‘rinni egalladi, deb xabar qiladi O‘zbekiston Milliy olimpiya qo‘mitasi matbuot xizmati.
Dunyoning 35 davlati vakillari ishtirokida bo‘lib o‘tgan mazkur musobaqada Vadim Menkov va Serik Mirbekov juftligi ikki kishilik qayiqda 500 va 1000 metr masofalarga kanoeda eshkak eshish bo‘yicha o‘tkazilgan poygalarda marra chizig‘iga birinchi bo‘lib yetib keldi va ikkita oltin medalni O‘zbekiston hisobiga keltirdi. Yana bir oltin medalga xotin-qizlar o‘rtasida 200 metr masofaga kanoeda eshkak eshish bo‘yicha bir kishilik qayiqda o‘tkazilgan poygada Dilnoza Raxmatova sazovor bo‘ldi.
Vadim Menkov va Serik Mirbekovdan iborat juftlik, shuningdek, 200 metr masofaga kanoeda eshkak eshish musobaqasida ikkinchi o‘rinni egalladi. Bundan tashqari 200 metr masofaga kanoeda eshkak eshish bo‘yicha o‘tkazilgan musobaqada Nilufar Zokirova hamda 1000 metr masofaga kanoeda eshkak eshish bo‘yicha o‘tkazilgan poygada Gerasim Kochnev ham kumush medal sovrindori bo‘ldi.
Gerasim Kochnev 5000 metr masofaga kanoeda eshkak eshish musobaqasida bronza medali sohibi bo‘ldi. Yana bir bronza medalga baydarkachi Aleksey Mochalov 500 metr masofaga bo‘lib o‘tgan poygada sazovor bo‘lgan.
Izoh (0)