Janubiy Koreyada Koronavirus tomonidan kelib chiqqan Yaqin Sharq respirator sindromi (YaSHRS-KoV) bilan kasallangan ayol va erkak vafot etdi. Bu haqda mamlakat Sog‘liqni saqlash vazirligi axborotiga asoslanib, “TASS” xabar bermoqda.
Vazirlik ma’lumotlariga ko‘ra, dushanba oqshomida ushbu kasallik yana olti kishida aniqlangan. Rasmiy hisob-kitoblarga ko‘ra, Janubiy Koreyada Yaqin Sharq koronavirusi bilan zararlanganlar soni 25 nafarga yetgan.
Hozirgi vaqtda butun mamlakat bo‘ylab 682 kishi karantinga joylashtirilgan, ular koronavirus tashuvchilari bilan muloqotda bo‘lganlikda gumon qilinib, jamiyatdan ajratib qo‘yilgan.
Janubiy Koreya bosh vaziri vazifasini bajaruvchi Chxve Gyon Xvan hukumatning seshanba kuni bo‘lib o‘tgan favqulodda yig‘ilishida aholi orasida vahima ko‘tarilmasligi uchun barcha zarur choralarni ko‘rishga chaqirdi.
Ayni vaqtda, bosh vazirning qayd etishicha, mamlakat aholisi “tibbiyot mas’ullarining kasallikka qarshi harakatlari samarasiz bo‘ldi deb hisoblayapti”. “Xalqimiz xavotirini yo‘qotish uchun barcha imkoniyatlardan foydalanishimiz shart”, - dedi bosh vazir.
Izoh (0)