Жанубий Кореяда Коронавирус томонидан келиб чиққан Яқин Шарқ респиратор синдроми (ЯШРC-КоВ) билан касалланган аёл ва эркак вафот этди. Бу ҳақда мамлакат Соғлиқни сақлаш вазирлиги ахборотига асосланиб, ТАСС хабар бермоқда.
Вазирлик маълумотларига кўра, душанба оқшомида ушбу касаллик яна олти кишида аниқланган. Расмий ҳисоб-китобларга кўра, Жанубий Кореяда Яқин Шарқ коронавируси билан зарарланганлар сони 25 нафарга етган.
Ҳозирги вақтда бутун мамлакат бўйлаб 682 киши карантинга жойлаштирилган, улар коронавирус ташувчилари билан мулоқотда бўлганликда гумон қилиниб, жамиятдан ажратиб қўйилган.
Жанубий Корея бош вазири вазифасини бажарувчи Чхве Гён Хван ҳукуматнинг сешанба куни бўлиб ўтган фавқулодда йиғилишида аҳоли орасида ваҳима кўтарилмаслиги учун барча зарур чораларни кўришга чақирди.
Айни вақтда, бош вазирнинг қайд этишича, мамлакат аҳолиси «тиббиёт масъулларининг касалликка қарши ҳаракатлари самарасиз бўлди деб ҳисоблаяпти». «Халқимиз хавотирини йўқотиш учун барча имкониятлардан фойдаланишимиз шарт», - деди бош вазир.
Изоҳ (0)