Mail.Ru Group tarkibiga kiruvchi, ish izlashga mo‘ljallangan HeadHunter onlayn-servisi 1-iyundan boshlab O‘zbekiston, Gruziya va Qirg‘izistonda o‘z saytini ochdi, deb xabar qiladi “RBK”.
HeadHunter’ning yangi versiyasi hozircha rus tilida ishlamoqda. Tez orada uning mobil dasturi, 2015-yil oxiriga borib esa har bir davlatning o‘z tilidagi versiyasi ishga tushirilishi ko‘zda tutilgan.
Yangi saytlar — Gruziya uchun Headhunter.ge, O‘zbekiston uchun hh.uz va Qirg‘iziston uchun headhunter.kg nomlari ostidan 1-iyundan ishga tushdi. Hozirda saytning O‘zbekiston uchun atalgan versiyasida 3 mingdan ortiq ish izlovchilarning rezyumesi bor. HeadHunter kuzgacha ish beruvchilarning e’lonlari uchun pul olmaydi.
HeadHunter’ning maqsadi yangi bozorlarda ham yetakchilik qilish. Hozirda servis Qozog‘iston, Ukraina, Belarus va Ozarbayjonda yetakchilik qilmoqda.
Rabota66.ru asoschilaridan biri Yevgeniy Ostrovskiy aytishicha, hozirgi kunda O‘zbekistonda Myjob.uz o‘zini yetakchi deb hisoblamoqda. Uzjobs.uz va Rossiyaning Superjob.uz saytlari keyingi pog‘onalarda bormoqda. “Ammo bozor va uning yetakchilari haqida gapirish shart emas. Bozor umuman yo‘q – pul mutlaqo nul va yaqin kelajakda hech nima o‘zgarmaydi”, — dedi Ostrovskiy.
Izoh (0)