O‘zbekiston Bojxona kodeksiga “yashil yo‘lak” haqida tushuncha kiritiladi

O‘zbekiston Oliy Majlisi Qonunchilik palatasi deputatlari Bojxona kodeksining yangi tahrir loyihasini muhokama qilishmoqda. Bu haqda “Gazeta.uz” xabar bermoqda.

Amaldagi Bojxona kodeksi 1997-yilda qabul qilingan bo‘lib, bugungi kun talablariga javob bermaydi. Bundan tashqari, shu vaqtgacha 15 marta tuzatish kiritilgan amaldagi Bojxona kodeksi talablari ko‘p jihatdan xalqaro amaliyotga mos kelmaydi.

Bojxona kodeksining yangi tahririda jismoniy shaxslar tomonidan tovarlarni olib o‘tish tartibi batafsil tartibga solinadi. Shu bilan birga, jismoniy shaxslar uchun “yashil va qizil yo‘lak” tizimlari qonun darajasida mustahkamlanadi.

Bojxona kodeksining yangi tahririda bojxona organlari mansabdor shaxslari tomonidan qaror qabul qilish uchun belgilangan muddatlar keskin qisqartiriladi, tovarlar bojxona hududiga yetib kelguniga qadar ular haqidagi oldindan axborot berishning yangi mexanizmi joriy etiladi.

Bojxona nazoratining beshta yangi ko‘rinishini – tushuntirish olish, bojxona ko‘rigi, tovarlarning maxsus markalar yordamida markirovka qilinganini tekshirish, bojxona kuzatuvi va tovarlar chiqqanidan so‘ng bojxona nazorati.

Bundan tashqari, kodeksning yangi tahriri loyihasida bojxona rasmiylashtiruvini amalga oshirish vaqtida bojxona organlariga taqdim etiladigan hujjatlar sonini ham qisqartirish ko‘zda tutilgan.