O‘zbekistondagi ta’lim ko‘rgazmasida Rossiyaning olti universiteti qatnashmoqda

Rossiyaning olti oliy ta’lim muassasasi shanba kuni Toshkentda ochilgan “Ta’lim va kasb-2015” xalqaro ko‘rgazmasida ishtirok etmoqda. “RIA Novosti”ning xabar berishicha, 2-iyun kuni ko‘rgazma Samarqandga ko‘chadi va 4-iyun kuni Buxoroda o‘z ishini yakunlaydi.

Mariy davlat universiteti va Ijevsk davlat texnika universiteti O‘zbekistondagi mazkur ko‘rgazmada ilk bor ishtirok etmoqda. Ijevskdagi OTM vakillari Toshkent davlat universiteti bilan hamakorlik to‘g‘risida bitim imzoladi.

“Kelishuvga ko‘ra, o‘zbekistonlik talabalar bizda o‘qishadi, kelasi semestrdan boshlab esa bizning o‘qituvchilarimiz Toshkent davlat texnika universitetida ma’ruzalar o‘qiydi”, - dedi Ijevskdagi OTM qabul komissiyasi mas’ul kotibi Aleksandra Gubert.

Hozirgi vaqtda Rossiyada o‘zbekistonlik 12 ming nafar talaba tahsil olmoqda, Toshkentda esa Rossiyaning uchta — Moskva davlat universiteti, Plexanov nomidagi Rossiya iqtisodiyot universiteti va Gubkin nomidagi Rossiya davlat neft va gaz universiteti filiallari faoliyat olib bormoqda.