O‘zbekiston Respublikasi Sog‘liqni saqlash vazirligi, Kardiologlar uyushmasi, Respublika ixtisoslashtirilgan kardiologiya markazi hamkorligida O‘zbekiston kardiologlarining VII syezdi tashkil etildi, deb xabar qiladi O‘zA.
Unda Janubiy Koreya, Hindiston, Germaniya, Shveytsariya, Rossiya, Vengriya, Polsha, Chexiya va boshqa mamlakatlardan yuzga yaqin olimlar, shifokorlar, yosh tadqiqotchilar, xalqaro tashkilotlar vakillari ishtirok etdi.
Jahon sog‘liqni saqlash tashkilotining ma’lumotiga ko‘ra, dunyoda har ming chaqaloqning 6—7 nafarida tug‘ma yurak nuqsoni qayd etiladi. Bu xastalikni operatsiya yo‘li bilan butunlay bartaraf etish va bemorni to‘laqonli hayotga qaytarish mumkin. O‘zbekistonda bunday xastalik aniqlangan bemor bolalarni sog‘lomlashtirish davlat byudjeti va xayriya tashkilotlari mablag‘lari hisobidan amalga oshirilmoqda.
Respublika ixtisoslashtirilgan kardiologiya markazi mutaxassislarining so‘zlariga ko‘ra, arterial bosimni nazorat qilish miokard infarktini 40—50 foizga, miya insultini 60 foizga kamaytirish imkonini beradi. O‘zbekistonda so‘nggi besh yil ichida o‘tkir miokard infarktidan kelib chiqadigan o‘lim ko‘rsatkichini 9—10 foizga kamaytirishga erishildi.
Ilgarilari bolalarga kardiojarrohlik sohasida tibbiy yordam ko‘rsatish ishlari ular uch yoshga to‘lganidan keyin boshlanardi. Kardiojarrohlik majmuasida chaqaloqlarga ham mazkur yo‘nalishda tibbiy yordam ko‘rsatilmoqda. Bu xastaliklarni erta bosqichlarda bartaraf etish imkonini bermoqda.
O‘zbekistonda sog‘liqni saqlash sohasida amalga oshirilayotgan keng ko‘lamli islohotlar, kardiologik xizmatning bugungi ahvoli va istiqbollari, yurak-qon tomir kasalliklarining oldini olish, ularni jarrohlik yo‘li bilan davolash, innovatsion texnologiyalar va ularning amaliyotga tatbiq etilishiga oid ma’ruzalar tinglandi, fikr almashildi.
Izoh (0)