Koreya xalqaro hamkorlik agentligi (KOICA) 2015-2017-yillarda O‘zbekistonga hamkorlik dasturi doirasida qiymati 58 million dollar bo‘lgan grantlarni taqdim etadi. Bu haqda UzDaily xabar bermoqda.
O‘zbekiston Prezidenti Islom Karimovning Seulga tashrifi doirasida O‘zbekiston va Janubiy Koreya KOICA bilan 2015-2017-yillarga mo‘ljallangan hamkorlik dasturini imzoladi.
Unga ko‘ra, qiymati 58 million dollar bo‘lgan grantlarni jalb etish orqali O‘zbekistonda 11 loyihani amalga oshirish rejalashtirilmoqda.
Jumladan, Toshkent aeroportini modernizatsiya qilish va yangi xalqaro terminal barpo etish loyihasining texnik-iqtisodiy asosini ishlab chiqish, quriladigan IV darajali zamonaviy ko‘p tarmoqli klinikalar uchun yuqori malakali tibbiyot xodimlarini tayyorlash va tibbiyot uskunalariga xizmat ko‘rsatish markazlarini, Xorazm va Farg‘ona viloyatlarida texnik mutaxassisliklar bo‘yicha kadrlar tayyorlash markazlarini tashkil etish, zamonaviy axborot-resurs markazini qurish va jihozlash, elektron o‘qitish tizimini joriy etish hamda o‘quv-ilmiy laboratoriyalarni jihozlash orqali Toshkent axborot texnologiyalari universitetini rivojlantirish loyihalari shular jumlasidandir.
Izoh (0)