O‘zbekiston Davlat raqobat qo‘mitasi aholiga osh tuzi yetkazib berayotgan Salt Grand Trade kompaniyasining mahsulotida iste’molchilarga yetkazilayotgan axborotlarni tahlil qilib, o‘rganish jarayonida kompaniya tomonidan ishlab chiqarilayotgan Safina osh tuzining qadog‘ida “№1 v Uzbekistane” va “luchshiy produkt” yozuvlari mavjudligi aniqladi.
Qo‘mita matbuot xizmatining xabar berishicha, “O‘zbekistonda birinchi raqamli” va “eng yaxshi mahsulot” yozuvlariga tushunturish so‘ralganda, Salt Grand Trade kompaniyasi o‘zi qadoqlayotgan osh tuzi boshqa tuzlardan sifati va yaxshi mahsulotligi bilan farq qilishini bildirdi. “Lekin yozuvlarni tasdiqlovchi dalillarni qo‘mitaga taqdim eta olmadi”, - deyiladi xabarda.
Mazkur osh tuzi qadog‘i o‘ramida tovarning ishlab chiqarilgan sanasi va tovarning xizmat (yaroqlilik) muddati ko‘rsatilganligi, biroq ushbu muddat tugaganidan keyin iste’molchi nima ishlar qilishi zarurligi, shuningdek, bunday ishlarni bajarmaslik natijasida kelib chiqishi mumkin bo‘lgan oqibatlar to‘g‘risidagi ma’lumotlarni ko‘rsatilmaganligi aniqlandi.
Yuqoridagilarga asosan, Salt Grand Trade kompaniyasiga nisbatan belgilangan tartibda ish qo‘zg‘atilgan, qo‘mitaning maxsus komissiyasi tomonidan kompaniya “Iste’molchilarning huquqlarini himoya qilish to‘g‘risida”gi qonunning 6-moddasi talablarini buzgan deb topilib, qonun buzilishlarini bartaraf etish va keyinchalik takrorlamaslik bo‘yicha ko‘rsatma berilgan.
Bundan tashqari, korxona rahbariga qo‘mita tomonidan Ma’muriy javobgarlik to‘g‘risidagi Kodeksning 178-moddasiga asosan, iste’molchilarga tovarlar to‘g‘risida axborot taqdim etmaganlik yoki bila turib noto‘g‘ri ma’lumotlar taqdim etganlik holati yuzasidan ma’muriy jarima qo‘llanilgan.
Izoh (0)