Ўзбекистон Давлат рақобат қўмитаси аҳолига ош тузи етказиб бераётган Salt Grand Trade компаниясининг маҳсулотида истеъмолчиларга етказилаётган ахборотларни таҳлил қилиб, ўрганиш жараёнида компания томонидан ишлаб чиқарилаётган Safina ош тузининг қадоғида «№1 в Узбекистане» ва «лучший продукт» ёзувлари мавжудлиги аниқлади.
Қўмита матбуот хизматининг хабар беришича, «Ўзбекистонда биринчи рақамли» ва «энг яхши маҳсулот» ёзувларига тушунтуриш сўралганда, Salt Grand Trade компанияси ўзи қадоқлаётган ош тузи бошқа тузлардан сифати ва яхши маҳсулотлиги билан фарқ қилишини билдирди. «Лекин ёзувларни тасдиқловчи далилларни қўмитага тақдим эта олмади», - дейилади хабарда.
Мазкур ош тузи қадоғи ўрамида товарнинг ишлаб чиқарилган санаси ва товарнинг хизмат (яроқлилик) муддати кўрсатилганлиги, бироқ ушбу муддат тугаганидан кейин истеъмолчи нима ишлар қилиши зарурлиги, шунингдек, бундай ишларни бажармаслик натижасида келиб чиқиши мумкин бўлган оқибатлар тўғрисидаги маълумотларни кўрсатилмаганлиги аниқланди.
Юқоридагиларга асосан, Salt Grand Trade компаниясига нисбатан белгиланган тартибда иш қўзғатилган, қўмитанинг махсус комиссияси томонидан компания «Истеъмолчиларнинг ҳуқуқларини ҳимоя қилиш тўғрисида»ги қонуннинг 6-моддаси талабларини бузган деб топилиб, қонун бузилишларини бартараф этиш ва кейинчалик такрорламаслик бўйича кўрсатма берилган.
Бундан ташқари, корхона раҳбарига қўмита томонидан Маъмурий жавобгарлик тўғрисидаги Кодекснинг 178-моддасига асосан, истеъмолчиларга товарлар тўғрисида ахборот тақдим этмаганлик ёки била туриб нотўғри маълумотлар тақдим этганлик ҳолати юзасидан маъмурий жарима қўлланилган.
Изоҳ (0)